Ахмет Қуанұлы Жұбанов – музыкатанушы, жазушы-тарихшы, композитор, дирижер, ҚР ҰҒА-ның академигі, өнертану ғылымдарының докторы, ҚазКСР-нің халық артисі. Ақтөбе облысы Темір ауданында 1906 жылы29 сәуірде өмірге келген. Өнердегі алғашқы ұстаздары – Талым күйші болса, өмірге кзқарасының қалыптасуына жазушы Жиенғали Тілепбергенов, ғалым ағасы Құдайберген Жұбанов әсер етті.1929 жылы Ленинградтың М.И. Глинка атындағы техникумында, консерваторияда оқыған.1930 жылы Ленинградтағы «Рабочий и театр» журналында жарияланған мақаласынан бастап, өмірінің соңына дейін қазақ музыкасының тарихы мен теориясын зерттеумен айналысты.1932жылы Ленинградтағы Актер шеберлігі мектебінің аспинрантурасына түседі.1934 жылыА. К. Жұбанов алғаш 11 адамнан құралған домбырашылар ансамблі негізінде Қазақ ұлттық халық оркестрін ұйымдастырды. Осы ұжымның тұңғыш дирижері ретінде көптеген халық композиторларының музыка туындыларын оркестрге лайықтап нотаға түсірген. 1945-1951 жылдары Алматы консерваториясының ректоры, 1954-1961 жылдары осы консерваториядағы өзі ашқан халық аспаптар кафедрасының меңгерушісі болып, қазақ халық музыкасының тарихынан, дирижерлік өнер мен аспаптану пәнінен сабақ берді.

А. К. Жұбанов — қазақ халқының қазіргі заманғы кәсіби музыкасының негізін қалаған аға буын композиторлардың бірі. Ол халық күйлерін оркестрге лайықтап, нотаға түсірді және қазақ музыкасын күрделі аспаптық симфониялық шығармалармен байытты. Олар «Тәжік биі», «Қазақ билері», «Төлеген Тоқтаров», «Ария», «Вокалдық сюитасы», «Абай сюитасы», тағы басқалар. А. Жұбановтың композиторлық шығармаларының көрнектілері Л. Хамидимен бірлесіп жазған «Абай» (1944) және «Төлеген Тоқтаров» (1947) опералары, қызы Ғ. Жұбанова аяқтаған «Құрманғазы» (1970) операсы.

Ахмет Қуанұлы Жұбанов қазақтың ұлттық өнерін дамытуға қосқан үлесі үшін Қазақстан Мемлекеттік сыйлығының лауреаты атағына ие болған. Ленин орденімен, және тағы басқа ордендермен, медальдармен марапатталған. Алматы қаласының көшелерінің біріне, Республикалық музыкалық мектеп-интернатқа Жұбанов есімі берілген. Ақтөбедегі музыка колледжі, көшелер А. К. Жұбанов есімінде. Өзі ұзақ жыл тұрған үйдің қабырғасында ескерткіш тақта орнатылған.

«Ғылым ордасы» РМК Орталық ғылыми кітапханасы Ахмет Қуанұлы Жұбановтың өмірі мен қызметі жайында, ғылыми еңбектері, музыкалық мен ол туралы жазылған естеліктерден кітап көрмесін ұйымдастырды.