Ақын, аудармашы, сыншы, журналист, қоғам қайраткері, филология ғылымдарының докторы Асқар Құрмашұлы Егеубаев 1950 жылы Шығыс Қазақстан облысы, Күршім ауданындағы Күршім ауылында дүниеге келген. Ақынның алғашқы өлеңдері 1964 жылдан бастап Зайсан ауданының «Достық» газетінде жариялана бастаған.

     1974 жылы аль-Фараби атындағы Ұлттық университетті бітіргеннен кейін «Қазақстан коммунисі», «Жұлдыз» журналдары мен «Қазақ әдебиеті» газетінде қызмет істеген. «Қазақ энциклопедиясы» баспасында бас редактордың орынбасары болды. Қазақстан Республикасы Жоғары кеңесінде баспасөз хатшысы, ҚР Парламенті Сенаты ақпаратында жауапты қызметтерде болды.

     Әль-Фараби атындағы Ұлттық университетінде оқытушы, 1997-2001 жылдары ҚР Президенті жанындағы Ұлттық Жоғары мемлекеттік басқару мектебінде бағдарлама жетекшісі болып қызмет істеді. 

     Көне түркі әдеби мұраларын зерттеп, ежелгі түркі ескерткіштерін аударды. 1986 жылы Ж.Баласағұнның «Құтадғу білік» дастанын, М.Қашқаридың «Диуани лұғат ит-түрк» еңбегін қазақ тіліне аударып, оқырмандарға ұсынды. Аударма негізінде «Кісілік кітабы»атты ғылыми-зерттеу еңбегін жазды.
     2001 жылдан бастап өмірінің соңына дейін Ғылым академиясының М.О.Әуезов атындағы Әдебиет және өнер институтында бөлім меңгерушісі болып ғылыммен айналысты. «Ежелгі дәуірдегі қазақ әдебиетінің көркемдік жүйесі (Х-ХІІ ғасырлар: көркемдік- эстетикалық ізденістер мен түрленулер)» атты тақырыпта докторлық диссертацисын қорғады. Ғалым-ақын Қазақстан Ленин комсомолы, Жамбыл атындағы Халықаралық, Махамбет атындағы сыйлықтардың лауреаты. Жастар мен студенттердің 1985 жылғы Москвада өткен Бүкіл дүниежүзілік ХІІ фестивалінің дипломанты.